പതിനഞ്ചാം നൂറ്റാണ്ടിൽ ജീവിച്ചിരുന്ന അരുണഗിരിനാഥർ എന്ന കവിയാണ് തിരുപ്പുകഴ് എന്ന തമിഴ് സംഗീത രൂപത്തിന് ജന്മം നൽകിയത്. മുരുകനെ പ്രകീർത്തിച്ചു കൊണ്ടുള്ള പദങ്ങളാണ് തിരുപ്പുകഴ്. ഏതാണ്ട് 16000 ഗാനങ്ങളാണ് അദ്ദേഹം രചിച്ചിട്ടുള്ളത്. ഇവയിൽ 75%ത്തോളം വരുന്നവ ഇന്ന് പാടി വരുന്നില്ല എന്നതാണ് ദുഃഖകരം.
അരുണഗിരിനാഥർ അന്ന് ഉപയോഗിച്ചിരുന്ന രാഗങ്ങളല്ല ഇപ്പോൾ പാടിക്കേൾക്കുന്നത്. ഇന്ന് കേൾക്കുന്ന തിരുപ്പുകഴിലെ രാഗങ്ങൾ കാഞ്ചീപുരം നൈന പിള്ളയും, അദ്ദേഹത്തിന്റെ ശിഷ്യൻ ചിറ്റൂർ സുബ്രഹ്മണ്യം പിള്ളയുമാണ് ചിട്ടപ്പെടുത്തിയിട്ടുള്ളത്. ജി.എൻ.ബി., എം.എം. ദണ്ഡപാണി ദേശികർ മുതലായവർ കച്ചേരികളിൽ ധാരാളമായി തിരുപ്പുകഴ് പാടിയിരുന്നു.
തമിഴ്നാട് ഡോക്ടർ ജയലളിത മ്യൂസിക് & ഫൈനാർട്ട്സ് യൂനിവേഴ്സിറ്റിയുടെ വൈസ് ചാൻസലർ ഡോക്ടർ പ്രമീള ഗുരുമൂർത്തി തിരുപ്പുകഴ് മാത്രമായി കച്ചേരി നടത്തിയിട്ടുള്ളതായി ഒരു സൗഹൃദ സംഭാഷണത്തിൽ എന്നോട് പറഞ്ഞിട്ടുണ്ട്.
അപൂർവ്വമായ താളങ്ങളിലും തിരുപ്പുകഴ് ചിട്ടപ്പെടുത്തിയിട്ടുണ്ട്. 19 അക്ഷരമുള്ള താളത്തിൽ തിരുപ്പുകഴ് ചിട്ടപ്പെടുത്തിയിട്ടുള്ളതായി കേട്ടിട്ടുണ്ട്.
narayanan.desamangalam 