ഭാഗവത മേള നാടകം

തമിഴ് നാട്ടിലെ മേലട്ടൂർ എന്ന ഗ്രാമത്തിലാണ് ഭാഗവത മേള നാടകം ഉത്‌ഭവിക്കുന്നത്. നരസിംഹ ജയന്തിയോടനുബന്ധിച്ചാണ് ഈ നൃത്ത നാടകം അരങ്ങേറിയിരുന്നത്. ത്യാഗരാജസ്വാമികളുടെ മുതിർന്ന തലമുറയിലെ വെങ്കട്ടരാമ ശാസ്ത്രി 12 നൃത്തനാടകങ്ങൾ രചിച്ചിട്ടുണ്ട്. ഇവയിൽ പ്രഹ്ലാദ, മാർക്കണ്ഡേയ, ഉഷാ പരിണയം, രുഗ്‌മാംഗദ, ഹരിശ്ചന്ദ്ര എന്നീ നാടകങ്ങൾ തഞ്ചാവൂർ, മേലട്ടൂർ, ശൂലമംഗലം, ഊത്തുക്കാട്, തിരുപ്പെരുമനല്ലൂർ എന്നീ ഗ്രാമങ്ങളിൽ മെയ്, ജൂൺ മാസങ്ങളിൽ അവരിപ്പിച്ചിരുന്നു.ഭാഗവതർമാർ മാത്രം പങ്കെടുത്തിരുന്ന കാരണം ഭാഗവത മേള നാടകം എന്ന പേര് വന്നു.ഭാഗവത മേള നാടകത്തിൽ കർണ്ണാടക സംഗീതത്തിലെ രാഗങ്ങൾ തന്നെയാണ് ഉപയോഗിച്ചിരുന്നത്. ശങ്കരാഭരണം, മോഹനം, കല്യാണി എന്നീ രാഗങ്ങളും, ആദിതാളം, രൂപക തളം, മിശ്ര ചാപ്പ്, ഖണ്ഡ ചാപ്പ്എന്നീ താളങ്ങളുമാണ് ഉപയോഗിച്ചിരുന്നത്. മൃദംഗം, പുല്ലാംകുഴൽ, വയലിൻ എന്നിവയായിരുന്നു പക്കവാദ്യങ്ങൾ.തമിഴ് നാടിന്റെ സംസ്കൃത നാടകവുമായുള്ള ബന്ധം നിലനിർത്തുന്നത് ഭാഗവത മേള നാടകമാണ്.