സ്ക്കൂൾ ഓർമ്മകൾ

സ്ക്കൂൾ അസംബ്ലി ഗ്രൗണ്ട്. വരിവരിയായി ഓരോ ക്ലാസുകാരും നിൽക്കുന്നു.

“പ്രെയർ.” ഹെഡ് മാസ്റ്റർ പിഷാരോടി മാഷിന്റെ പരുപരുത്ത, പരുഷ ശബ്ദം.

സ്ഥിരം പ്രാർത്ഥനാ ഗായക സംഘം – തോമസ് ഫെൻ, എൻ.രാജഗോപാലൻ, ഞാൻ – ഹെഡ് മാഷിന്റെ തൊട്ടു മുമ്പിൽ നിന്ന് പ്രാർത്ഥന പാടും.

ഞങ്ങളുടെ സ്ക്കൂളിലെ കായികാധ്യാപകനായിരുന്ന ജനാർദ്ദനൻ മാഷ് സംഗീതം നൽകിയ മൂന്ന് പാട്ടുകളാണ് സ്ഥിരം പാടുക.
– തന്തിരുവടി
– വരൂ നവ നവാകാരം
– കരളിലും കരളായി ജനാർദ്ദനൻ മാഷ് ഒരു നല്ല സംഗീതജ്ഞനായിരുന്നു. ക്ലാരിനെറ്റ്, പുല്ലാങ്കുഴൽ, തബല എന്നീ വാദ്യങ്ങളിൽ പ്രവീണനായിരുന്നു. ലളിത ഗാനങ്ങൾ നന്നായി ട്യൂൺ ചെയ്തിരുന്നു.

മാഷ് ഇന്നില്ല. പക്ഷെ മാഷ് ചിട്ടപ്പെടുത്തിയ ഈ പ്രാർത്ഥനകൾ ഇന്നും മറന്നിട്ടില്ല. പലർക്കും പഠിപ്പിച്ചു കൊടുത്തിട്ടുമുണ്ട്.

ഗായക സംഘത്തിലെ തോമസ് ഫെൻ കോട്ടയത്തടുത്താണ് താമസം. എൻ.രാജഗോപാലൻ തൃശൂരും. ഏതാണ്ട് 50 കൊല്ലമായി ഇവരെ കണ്ടിട്ട്. തോമസിനോട് WhatsApp വഴി സംസാരിയ്ക്കാറുണ്ട്!

എല്ലാവരെയും ഒന്നു കാണണം, സംസാരിയ്ക്കണം.

“വരും കൊല്ലമാരെന്നും എന്തെന്നുമാർക്കറിയാം.”